Kasami me kritika të ashpra drejtë qeverisë LSDM-BDI: “Vendi është në krizë të thellë, sa më shpejt zgjedhje të parakohshme parlamentare”

Shpërndaje

Pas dështimit të Qeverisë LSDM-BDI, për mos marrjen e datës së Maqedonisë së Veriut nga Bashkimi Evropian, sot në një kpnferencë për shtyp u paraqit lideri i Lëvizjes Besa, Bilall Kasami i cili kërkoi urgjentisht të ketë zgjedhje të parakohshme parlamentare, pasi siç tha ai vendi është në një krizë të thellë, transmeton ALBAZONE MEDIA.

Fjalimi i plotë i liderit të Lëvizjes Besa, Bilall Kasami:

Përgjigja negative për marrjen e datës për fillimin e negociatave me BE-në vërtetoi edhe njëherë dështimin e kësaj Qeverie. Edhe pse kjo qeveri erdhi me premtime të shumta, ajo thuajse nuk është duke realizuar asgjë dhe vendin e çoi shumë hapa prapa.

Lëvizja BESA, kohë më pare pati paralajmëruar se nuk është bërë aq sa duhet që ne të marrim datën për fillimin e negociatave. Nga dita e sotme, vendi është në krizë shumë të thellë dhe kapërcimi i kësaj krize zgjidhet duke dhënë dorëheqje kolektive ky kabinet qeveritar dhe vendi sa më shpejt të shkojë në zgjedhje të parakohshme parlamentare.

BESA, edhe pse parti opozitare, gjatë gjithë kohës u ka bërë thirrje instituciоnеve të BE-së që gjatë vendimarrjes për rrugëtimin e më tutjeshëm të vendit drejt BE-së, të kenë parasysh interesin dhe orientimin euro-atlantik të qytetarëve të Maqedonisë së Veriut, pa dallim përkatësisë së tyre etnike. Por si duket edhe njëherë dështimet e qeverisë ishin shumë më të mëdha sesa gatishmëria e disa vendeve evropiane për të na pranuar në BE.

Krizën e thellë në të cilën gjendet Maqedonia e Veriut pas dështimit të radhës të kësaj qeverie e tregon më së miri edhe ftesa e presidentit për takim liderësh ditën e diel. Lëvizja BESA qëndrimin e saj për daljen nga kriza do ta paraqesë edhe në takimin e liderëve dhe do të kërkojë zgjedhje të parakohshme parlamentare.